مصطفي قمر
انا الميت لكن صاحى
وانا بكتب وانا الماحى
انا اللى نسيت افراحى
وشمس نهاره ليل قاتم
ودمع انهاره ليه كاتم
انا ابن الطين وبيلاطم
فى موج القهر من غاشم
انا الفلاح وانا الملاح
ساعات دكتور يداوى جراح
وانا السواق على تكتوك
وانا العامل عايش سواح
انا الاجرى اللى بيشاكل عشان لقمة
وانا اللى يوماتى بيعانى من الزحمة
مقضيها عمرى عايش الدور
وبتنقل من طابور لطابور
انا المصرى عايش مقهور
وبالع عذرى بلسانى بايت مكسور
وشارب كل احزانى فى كل ماجور
وطاحن صبرى وحدانى بدون النور
انا البانى وانا الفانى بظلم البيه
انا فى ظل تشريعه عويل وسفيه
وعمره عاملنى فى حياته عالة عليه
انا ف عرفه عديم الدم
فقير فقره اساس الهم
انا الازمة فى كتر الدعم
بطاقة تموينى هيه سبب الدين
وكل تأمينى خراب بلدين
ياحسرة قلبى وحزن وويل
ونهر بيجرى فى بلادى بعمر طويل
وخير الدلتا والوادى صبح بنايات
بتعلا وارضنا بتهدم فى احلى ساعات