بقلم/ عادل سيف
ماتت زوجته وكان يزورها يوميا في قبرها يحكي لها كل ما يحدث ويسألها عن رأيها
وفيوم وهو واقف علي قبرها قال لها
(( زوجتي الغاليه...أم جلال))
انا مش قادر لسه اصدق انه بجد فارقتيني
اول حاجه دايما أقولها انه بجد وحشتيني
عم محمد جالي امبارح
طالب ايد بنتك ايمان
عم محمد راجل طيب
وابنه سعيد برضك انسان
قلت اجيلك واخد رأيك
دايما بالخير يشعر قلبك
وكمان فيه خبرين حلوين
باركي بقه لبنتنا ياسمين
نجحت في الدبلوم بجداره
وجابت اعلي الدرجات
وانا لفيت علي كل الحارة
وسقيت الكل الشربات
وكمان جِلال ابننا عدي
في اختبارات الشرطه بجد
حالف يوم ما يجيب البدله
يفرح فرحه ملهاش حد
قاللي يابابا يوم ما ألبسها
لازم اروح بيها لأمي
افرحي يمه
فرحك والله بيشيل همي
يعني جلال راح يصبح باشا
وانتي ها تبقي ام الباشا
نفسي اكون لبعض جمايلك يوم وفيت
يللي ف كل صلاتي عشانك ياما دعيت
كل منايا تكوني يا غاليه راضيه عليا
قولي اوامرك قبل ما اسيبك
كل اوامرك جوه عنيا
..............................