بقلم / رمضان العلالقة
سامحيني يا أنتي
إذا كنت غلطت
أو من نفسي
في مرة هربت
أصل بلملم أثر الكي
بس مكنتش أصلا شايف
لما قابلت كنت جريح
كنت بداوي الجرح وحيد
متخيلتش كل دا يحصل
بس الأفضل نبقى غلابة
فيه في الغابة ناس وحشين
عايشة في صورة بني ٱدمين
كنت بصدق أرضي و أصالح
لكن برده الطير الجارح
نازل طالع ما بيهداش
كنت بعيش في متاهة و خايف
مكنتش عارف توهت في بير
أبسط حلمي ضاع ببلاش
أنا مش بنكر أبدا خالص
كنت بحب بكل جنوني
رغم ديابة في ليل هاجموني
ما كنتش بخدع
كنت أتقطع ليل و نهار
بس أنا توبت و قلت خلاص
أصل يا أنتي الناس ظلموني
نزفوا الدم في عرض عروقي
قتلوا الوردة جوه في قلبي
كان يحرسها حلم ضرير
و بيرويها بدمع ضليل
يجري بين شطين من همي
كنت بغمي عيوني كتير
لجل ما أشوف الدنيا الغابة
و لا أتخيل حلم ذليل
كان دا بيحصل قبل ما أشوفك
قبل ما أحس بهمس كلامك
لمس أيديك بيطهر جرحي
بيسكنا في أجمل حي
و يطير بينا في حلم جميل
فيه نتخيل كوكب تاني
كوكب خالي من المخاليق
يعبر بينا حدود الليل
حتي في ليلي قمرك ضي
~~~~~~~~~~