بقلم / رمضان العلالقة
قبل منك كان تمام
أهي عيشه و السلام
غلبتني الدنيا قبلك
غرقتني في بحر يأسي
حيرة ضمتني بأيديها
كنت متعود عليها
ساكنة فيا من زمان
منها بهرب جوه نفسي
حاجة ضايعة مش لاقيها
توهة ما اعرف هيا إيه
حتى سني و عمري كله
مش لاقيه
نظرة فيكي دوبتني
رجعتلي العمر تاني
في الليالي و سهرتني
كل ليلة و في النهار
طفل يعشق انتظارك
و بجوارك لما نام
حط راسه فوق كتافك
حلم حلق فيه ملامحك
يرسم الضحكة في شفايفك
فجأة يصحى لما شافك
بدر هل فوق جبينك
و الملايكة من شمالك
و في يمينك
صوت بلابل ليك يغني
غنوة ألحانها الحنين
لحن عذب و غنوة هادية
تهز في القلب الجدار
....... باختصار ......
حلم صورلي الحقيقة
يعني أصبحتي أنت ليا
بفرش الورد في طريقك
و في أيديا شموع تنور
لجل تمشي في ألف ضي
حتى يرجع قلبي حي
كنت موتة و جثة هامدة
و النهاردا و أنتي جية
زي مهرة عايقة شاردة
لما شفتك من بعيد
فجر شقشق في عيونك
شمس تطلع بين جفونك
قلبي رفرف جوه مني
نبض صحصح بين ضلوعي
ينعش الحلم اللي عشش
جوه روحي
حلم عشته من سنين
من ساعتها قلبي حاسس
أبقى فارس صقر جارح
يعني مارد
لو تقرب نسمة منك
أو يهوب حر أضلك
و ابقى حارس لك أمين