عشق الشاى

بقلم أ / عبد الرحمن الحناوي 
شد حيلك يا مصري انت طول عمرك صبار *
مهما ليلك يطول ويطول عليك الانتظار *
انت أكتر شعب ضحي وحول الليل نهار *
بكرة الأمل يطرح لك رخاء واستقرار *
يا شعب كسر وحطم قيود الانكسار *
حمل وديع لكن في الشدة أسد جبار *
العدل يحيي الروح والظلم ذل ومرار *
والحب بين الناس بيحقق الانتصار *
كلنا إيد واحدة تبني مين بيكره العمار *
يا أكتر شعب ضحي واتصدي للاستعمار *
والغلا مص دمه والأسعار شايفينها نار *
والمطالب كل لحظة تعجزه تخليه محتار *
تستاهل جايزة نوبل يا مصري بكل فخار *
وياما لسه في جعبتك كتير من الأسرار *
علمت الدنيا الصمود والعزة بكل فخار *
يا مصري اصبر شوية بكرة تجني الثمار *
هو انت نادم علي وقفتك مع الثوار ؟ *
ولا انت مليت السياسة واتفرقوا الأحرار ؟ *
ولا لزمت الصمت واختفت كل الأسرار ؟ *
وقلت ازاي أعيش وحدي ورا الأسوار ؟ *
ولا انت شايف الدم بيسيل ليل ونهار ؟ *
بذنب من غير ذنب والقتل من غير قرار ؟ *
وقلت أعيش وحدي غريب وسط الديار ؟ *
مفاهيم ياما اتغيرت والعدو أصبح جار *
والحق صوته انكتم وراسه جوه النار *
والباطل لما اترسم جابوا له دوبلير سحار *
يا حسرتي دا الوطن علي وشك الانهيار *
ومين يا تري السبب السبب ناس أشرار *
تقدر تفرق يا مصري أخيار من أشرار *
وتعدل ميزان اختل بالحكمة والإصرار *
يا مصري ليك العجب غيرت كتير أفكار *
وغيرت نظام بلد وحيرت صانع قرار *
الأدب والشعر صنعوا منك بطل مغوار *
والرواية شغالة ولسه مانزلوش ستار *
يا مصري بطبعك حنين ولا قاسي جبار *
ولا صرخة حق صنعت منك عنيد مغوار *
اتكلم وقول دا العالم كله سامعك بانبهار *
والدنيا شافت بطولتك شعب وعرف يختار *
طريق الحق سلكته لا مذلة لا انكسار *
يارب علي شأنه واجعله ف صف الكبار *
واوقف نزيف الدم اللي سايل ليل نهار *
وابعد عننا الهم دا الشعب بات محتار *
خايف يجيله يوم ويبقي زي ( قندهار ) *
ويبقي القتل سنة وف شرعهم انتصار *
يارب وانتا المجيب ما تخليهاش دمار *
وارفع غضبك عننا وامنحنا الاستقرار *
تعبت قلوبنا وعينينا من كتر ضرب النار *
وسليمنا جاله المرض وتحول إلي ( بكار ) *
الخوف غرق بيوتنا والدمع صار أنهار *
والعدو شايف موتتنا لكن بحقده جار *
والكل سامع صوتنا حقنا فين : طار ! *
نفسي أشوف الأمل مالي قلوب الصغار *
نفسي أشوف الملل موضوع تحت الحصار *
نفسي أكلم جاري من غير ما أشوف شرار *
نفسي أكمل حلمي ووطننا يبقي عمار *
البسمة بحق وحقيقي مش جاية خلف ستار *
والضحكة تطلع عالية والحب مالي الدار *
والحزن يلبس ( طرحة ) وحاله يبقي مرار *
وتملي قلوبنا الفرحة يا حلاوة الانتصار *
زغزتي وعيشي السعادة يلا يا ست الدار *
الخير جايلك بزيادة كفاية عليكي انتظار *
هو احنا بقي فينا روح نحارب الأشرار *
تعبنا بجد ونفسنا طمعانة في الاستقرار *
يارب طمن شعبنا واكسر إيدين الغدار *
واكشف عننا الغمة علشان نعرف نختار *
شخص ياخد بإيدنا ويكمل بينا المشوار *