عشق الشاى

بقلم / عادل عمران
مش خطيئة عشقي ليكي
مش خطيئة أشتريكي
رغم رفضك وجودي وحدودي وقلبي
عصفورة على غصن روحي
خربشني منقارك جرحني
جوًه العذاب مرجحني
وانا عشت عمري أشتهيكي
” لست أدري ما الخطيئة”
كوني احبك مش خطيئة
سكنت غربان الضلمة ف نني
واخلع بدنى ألقى الوطاويط
وأحبك موت
واشتهيكي لحد حد الموت
بس يا خسارة في سكوت

مش قادر اصدق ما حصل
رغم الهزيمة
مش قادر اصدق تخدعيني
أو حتى تكدب عينيكي
مش خطيئة عشقي ليكي

ف عينيكي أرفض أتسجن
لكني تاعبني فراقك
ماشي ادوًر في الهوامش
من سمًك بابحث عن دائي
لملمت ذكرانا القديمة
وفردت صورتك عالبيوت

دواير دواير يا زمن حزني
والخطوة رحًالة بدون ترتيب
فردت صدري قوارب
بس الموج عالي وصعيب
وانا مستحيل افبل فراقك
غير لما يحضني تابوت

تعبتني خطاويكي
رفضتني موانيكي
وان عدًيت لهناك باتذكر
إنك مش ليًا وانا مش ليكي

كنت أضحوكة لضفايرك
وانا هدني لون العيون
شعلقتني عالرفوف
لخبطتني في الحروف
عجنتني في الجنون
مش خطيئة عشقي للعيون
مش خطيئة ازرع واديكي

مش خطيئة عشقي ليكي
الخطيئة اني أخون عينيكي
وانا عمري ما كنت خاين
وطول عمري عايش باشتهيكي
مش خطيئة عشقي ليكي
ده انتي حب عمري
وأوطان هيًا عينيكي

أرجوكي ما تمنعنيش إني احبك
أبوس يا حبيبتي إيديكي