عشق الشاى

الشاعرة / ســـــالى محمود 
* ** * ** * ** * ** * ** *
ليك فى القلب كام غنوة
باغنيها فى حضن الليل
وهمسة شوق وتنهيدة
ولحن جميل
ونغمة ناى بتتمايل 
مع المواويل
وكلمة حب تتحايل 
على ليلى
وصوت ربابة على وترها
بتحكيلى
نترجى زماننا ويا ايامى
حنيلى
واسمع صوتك جوا حلمى
يناديلى
وادوب فى ليل السهاد 
ما ادوق النوم
واعد ايامى تفوت
يوم ورا يوم
ولسة فى القلب الغناوى
وناوى احكيلك حكاوى
بس لو لجرحى تداوى
هاغنيلك واقول مواويل

الشاعر/ محمود جنــــــيدى 

* ** * ** * ** * 
لكى فى القلب كاام غنوة ..
وكاام همسة وكلمة حلوة ..
ولمعة العين تكشف السر ..
وحروف على وردتين حمر ..
وبسمة شفايف دليل فرحة ..
ونسمة غرام فى الفضا سارحة ..
على وتر الهوى اعزفلك ..
ونيض قلبى يقول مواويل ..
وصوت العشق بيقول ياليل ..
وتنهيدة جميلة ..
طالعة من صدر الحنين ..
طالعة تقول ألف بحبك ..
ألف ألف مشتاق لقربك ..
مشتاقلك حتى وانا جنبك ..
مشتاقلك ..
وليلى يشهد على سهرى ..
ودمعى اللى ع الخدود يجرى ..
من فرحتى لمّا بشوفك ..
فبلاش تغيبى عنى تانى ..
وانا مش حاغيب ..
حاكتب بقلبى على جدار الزمن :
إنك حبيبة ..
وانتى اكتبى إنى حبيب ..