بقلم/ عادل أبوزيد
البنت اللي ف عز وجعها
شيء رجّعها
والواد اللي ف عزعذابه
احساس جابه
أشواق بتخبّط على بابها
وبتزور بابه
علشان يتعاتبوا على فلوكه
على شط النيل
حلو عتابهم والنسمه يا دوب
بتهز نخيل
وتهز قلوبهم ويّاها والقارب
ع الميه يميل
احكيلي شويه يا واحشاني
قولي من تاني
ازاي وانا غايب عن عينك
بتعدّي الليل
وتخبّي ازاي دمعة تخونك
من غير مناديل
واحكيلي عن الليل وآلامه
وغُنى المواويل
طاب وانت يا زارع افراحي
ف وسط جراحي
ازاي بيجيلك قلب تسيبني
أدوق الويل