بقلم الشاعر / احمد ابراهيم
اوعاك تقول ازاي وليه
خليك عبيط
اسمع كلام معجون نفاق
ارقص وزيد
هات الطبول وارقص ونول
حبة فتات
واقضي الساعات
ع الرصيف
ده الحق مات
والظلم بات
ساكن ف حضن المظلومين
متقولش مين
غمض عنيك
واسكن ف حضن المجروحين
وابكي بأنين
ملعون ياحق
ده الوقت وقت
اللى راقص ع الطبول
نافق كمان نافق تنول
حبة فتات
ملعون ابو ام اللى عاش
عايش شريف
ده الزيف قوي
اما الشريف واقف ضعيف
كل البيبان متفتّحه
بس البيبان للرقاصين
مسرح كبير
فيها الخمور رقص الطبول
والدين جديد
فيها الطقوس
حبة نفاق داخل كؤوس
ده الغوطة لابسه السواد
دمعة حلب وف العراق
صرخة بلد
دم الروهينجه مستباح
قتلوا الرضيع
من غير سبب
اه يا يمن فاق الحدود
والموت وحاصد كل شئ
كل الطرق بتأدي دايما للطريق
واحد هلاك
فى دمشق والله وف العراق
فى ليبيا والله وف اليمن
ف الصومال
والويل ليكم يا عرب
القدس سرقنها الكلاب
والله سرقتها الكلاب