** * ** * ** * ** * **
نفسى أقولك حاجة بس تسمعيها ..
واما تسمعيها حاولى كويس تفهميها ..
دورى على معنى كل حرف فيها ..
هاتى كرسى واقعدى قدام مرايتك ..
اللى قدامك دى مش هى صورتك ..
يمكن تكونى تعرفيها أو قريبتك ..
يمكن تكون تشبهك بس دققى النظر ..
شوفى شكلها ازاى أحلى م القمر .؟؟.
على فكرة هى بتحبك وبتعشقك جدا ..
وبتدعيلك بالسعادة كل اما الفجر يدّن ..
وانتى ياخسارة للأسف مبتحبيهاش ..
طب جربى مرة تحبيها بس بجد ..
خليها أختك وصاحبتك وكل حد ..
اخلقى بينك وبينها ود ..
افهمينى كويس أرجوكى وخلى بالك ..
اما تلاقيها زعلانة قوليلها مالك ..
ولو تعبانة قوليلها سلامتك ياغالية ..
أيوة لأنها فعلا هى غالية ..
حبيها زى مابتحبك ..
افتحيلها بالحب قلبك ..
كلميها قوليلها والله بحبك ..
فيه حاجة معرفش ناسياها ليه ..
هى مش عايزة غير حب تلاقيه ..
عايزة صدر حنين تستخبى فيه ..
واما قلبها ينوجع ..
تلاقى حد حنين يطبطب عليه ..
ولو فى عنيها دمعة يمدلها اديه ..
ولو زاد الوجع نبضها يناديه ..
وعلى فكرة ..
الحد ده هو انتى بس ..
يارب بأه قلبك يحس ..
وتعرفى إنك محتاجالها ..
أكتر ماهى محتاجالك ..
وعلى قد مانتى محتاجالها ..
هى كمان والله محتاجالك ..
***************