بقلم الشاعر المصري / احمد ابراهيم النجار
انا صورة على برواز ومكسورة
على حائط جدار مشروخ
فى عيني الضحكه مرسومه
وانا عايش حلاوة روح
انا صورة ماليها رتوش
مابين الناس يفوت الليل ويرجع ليل
وانا بشرب مرار الكاس
واه يابرد فى جسدى كأنه رصاص
واه يا ناس هنا عايشين
ولا عايشين ولا فاهمين
ولا منكم فى يوم احساس
وتصرخ صورتى ع الجدران
ويرجع سيل ورعد وليل
يعيش عمري بخوف دايم
على الجدران
فى توب الوانه م الاحزان
اعيش واحد مالهوهشي وجود
مجرد صورة ف البرواز
ومكسور الأزاز منها
ملامحي فيها الفين عام
وانا عايش انا بينها
وانا عايش حلاوة روح
واه يا جروح هنا ساكنه
ولا مفرّقه فى يوم جسدي
واه يا دمعه بالحيرة
ما بتفارق فى يوم خدي
واه يا عمر بيعدي
كأنه دروب ومليانه هنا اشواك
واه يا فجر مش طايل
شروق شمسي
واه يا فرح مش مكتوب
ولا كان الامان وعدي
واه يا هروب من الماضي
من الحاضر من الأيام
يعدي العمر بالأوجاع
وانا بصرخ بكل جروح
على جدار الألم صورتي
انا صورة على برواز ومكسورة
على حائط جدار مشروخ
فى عيني الضحكه مرسومه
وانا عايش حلاوة روح