عشق الشاى

بقلم: مسعد سليم

بحلم أنام واصحي ألاقي
بكره جميل
و الحال يتغير والقلب
ما يشوف ويل

يا شمس طالعه تعالي
وشقشقي بالخير
دفي قلوبنا الطيبه
وطبطي ع الغير

خلي الفرحه تعرف
لطريقنا دليل
و للا انتي رافضه حلمنا
ومالناش سبيل

النهار ليه متكحل بلون
رموش الليل
فين طلة نور صباحه
اللي بيغنيلها الطير

يا بكره اللي جاي افرد
إيديك بالخير
وقول للورد يفتح لنا
ويجود بالعبير

والشجر اللي رويناه
بعرقنا كتير
يطرح و خيره
يداوي العليل

على ضي القمر حنو الأمل
باللون الدهب
دا اللي يعيش بالأمل
وحده الأمير

و فصلوا ثوب للأماني
م الحرير
قادر يحققها ربنا
دا ربك كبير