عشق الشاى

أوجاع / محمــود جنـــــيدى

قلبى بيبكى ..

بس بكا قلبى غير أى بكا ..

بكا قلبى آهات ،

طالعة لمن إليه المشتكى ..

بابكى من اللى بيجرى وعليه ..

وع الليالى الحالكة ..

بابكى على كل نقطة دم ..

وعلى هذا الشهيد وذلك ..

** ** ** **

قلبى بيبكى لكن بكاه ..

بكا الصمود والشموخ ..

بكا اللى لايخاف من رصاص ..

ولا حتى ميت مليون صاروخ ..

بابكى على اللى كان جاى يصلى ..

جاتله طلقة فى النافوخ ..

والأم اللى كانت بتنتظر رجوع ولدها ..

لكن للأسف ماجاش ..

وصبية شافت صورة خطيبها..

غرقان فى دمه وقطن وشاش ..

ومسجد بكى بحرقة ..

ع اللى كان جاى يصلى ولا صلاّش ..

** ** **

قلبى بيبكى لكن بكاه ..

للأسف مش أى بكاء ..

قلبى بيبكى على انسانية ماتت ..

وغدر بيقتل أبرياء ..

وأجنّة لسة فى الأرحام ..

حيتولدوا ياعينى بدون آباء ..

** ** **

قلبى بيبكى لكن بكاه ,,

عمره ماكان ولا حيكون عن ضعف ..

واسألوا التاريخ عنّى ..

وعن صبرى وعن جلدى ..

واسألوا الأرض العفية ..

اللى حتحضن بالحنان ولدى ..

والأرملة اللى ماشية فى الجنازة تقول:

قلبى بيبكى ياغالى عشانك ..

لكن بكا قلبى عزيمة وبكرة ..

حابعت ابنك مكانك ..

** ** **

قلبى بيبكى آه ..

وآهة قلبى مش هزيمة ..

لكن أمل فى بكرة ..

وحييجى بكل إصرار وعزيمة ..

ماهو لازم مصر تفضل مصر ..

أبية حرة وعظيمة..

لا يخوفنا زى ماقلت ..

رصاص والا صاروخ ..

كلنا جنود فى وقت الشدة ..

شباب ونساء وشيوخ ..

** ** **

قلبى بيبكى ..

لكن بكاه غير كل البكا ..

بكاه آهات طالعة ..

لمن إليه المشتكى ..

أشكيلك يا إلهى ..

يامن تقهر ولاتقهر ..

وادعيلك تنصر بلادى ..

بلد الأوليا والأزهر ..