بقلم/ أشرف الدغيدي
ياما قلبي اشتكي وشكالي
رغم إنه كتير عارف حالي
بيشكيلي گإني مش شايف
قلوب حواليا كتير آسيين
ولاد وإخوات لناسهم ناسيين
حتي من المولي مش خايفين
لآ رحمه فقلوبهم ولا حنيآ
وفالدنيا أغراب عايشيين
وبأحوال بعض ولا حاسين
حتي ولو كان فيهم الف عليل
او جعان بيه مش داريين
ووخداهم علي طول الدنيا
وبغدر ايامها مش فاهمين
وإن المتغطي بيها دايماً عريان
زي ماقالولنا أهل زمان
..............................................
هو ياناس ايه حصل للناس
قلوبها حجر مفيهاش احساس
عماله بتأذي في خلق الله
والناس مش طايقه حتي الأآه
والجار بيأذي في جاره
وحاطط حديد قدام داره
و مجنزرها شمال ويمين
لايعرف يركن عربيته
ولا يمشي حتي علي رجليه
.............................................
والكل بيسرق كله ومش خايف
طب ياخي ماهو ربك شايف
الشارع خلاص مبقاش شارع
ممنوع تمشي فيه انت وعيالك
وآه لو مشيت لوحدها بناتك
قهاوي وكارو بفواكه وحمار
وفرش ملابس ومطاعم وخضار
ونواصي مليانه شباب بيحشش
رايح جاي بيطوح ومدخشش
من غير نخوه ومن غيراخلاق
الشعر بفيونكه وليه ديل حصان
لابس جينز مقطع وبيه فرحان
الأخلاق راحت فين ياناس
الحنيه بقت أسوه والحب خلاص ضاع
والضحكه الحزن سرقها وراح
والسعاده في بيوتنا ضاعت
والطلاق نسبته فالسما راحت
وقلوب البنات تعاستها زادت
ولسه ياقلبي عمال تشكيلي
ماهي كل الأحوال مش عجباني
............................................