متقوليش اني الشروق أصبح وشيك
متقوليش أي شئ
شايف غروبك ع المدي
والفجر في حضنك غريق
متقوليش أي شئ
اتبسمي اتألمي اصرخي أو اضحكي
كل شئ أصبح شبيه لون طرحتك
غربة وضايع على سكتك
حتي توبك لون ملمحك شئ رهيب
طرحتك لونها السواد
وابتسمتك حبة مكسيه برماد
ايوه شايف كل شيء
علي كل باب تتسولي إزاي وليه ؟
وانتي خيرك ع الغريب
من زمن افتحي كتاب التاريخ
شوفي انتي بس مين
يا بهية مش ملمحك
والله تاه النور في صبحك
من سنييييييييين
ايوة عارف ايوة شايف
بس أيدي مربوطين
حتي صوتي مش لقيه
والحروف بين السطور متألمين
ايوة بكتبلك وانا بين الضياع
والشراع أصبح كسير
موج وعالي وبحر مسجور شب نار
حارق معاه كل شئ
والطريق أصبح مخاطر
والله زاد الحمل ذاد
والمزاد علي طرحتك لسه المزاد
متقوليش متقوليش كل شيء أصبح كبوس
واللي باقي م الطقوس حبة خمور متفرقين
بين النمور وازاي تكوني ازاي أكون
اكتبي موتك علي جزع الرحيل
وارسمي قبرك ونامي في سلام
ده الظلام أصبح رفيق كل الدروب
والبحر موج عالي وساحب كل شئ
يا بهية اتألمي وارقدي واستسلمي