معلش يا جد
الوقت أتغير
مبقاش حد بيعرف حد
بنت بتمشي بلبس مقطع
رايحة و جايه بوش ملطخ
و الواد يشبه أوي للبنت
أيوه يا جد الوقت أمال
لما نغني بنرقص تانجو
مبقاش حد يقول موال
هو يا جدي كده بالظبط
ستي بشدة توطي
في صوتها
لما بتحكي دموعها تفط
مين يسمعها ؟
مين هيطبطب
على مواجعها ؟
كله مركز أوي في النت
فاكر اللمة و أحنا صغار
أيام حلوة و خيرها كتير
ستي تولع لمبة جاز
و الطابلية في حضن الزير
زي الطير .. بتضم جناحها
هي بتحكي و بنسمعها
تضحك و تقول بس هزار
و أنتوا تبصوا
في عيون بعض
شفت في عينيك لمحة خوف
يمكن بكره كان مكشوف
كنت بتحكي كتير ع الأرض
يومها كأنك كنت تشوف
زرعة أرضك غطا م البرد
فاكر المندرة و الشمسية
كام جلابية في المسمار
جيلنا يا جدي هد الدار
لما تشوفها تقول يا خسارة
كل دا يحصل لجل عمارة ؟
و مغطيها باطباق دش
فيها باقي له محل إيجار
لجل يغير حال من حال
هد الساقية بزند أيديه
و الصفصافة تشد خدودها
خايفة الدور لفيوم يغلبها
و الجرافة تدوس في الكرش
جبت موتور شغال وحديه
بعد م مر الوقت خلاص
تاني أتغير حال الناس
فدان قمحك أصبح بور
أصبح فاضي في هو فراغ
و لا فيه زرعة بتفتح لونها
و لا فيه مسقة لشبر خضار
بكره هيطرح عمدان نور
أصل يا جد الزمن أتغير
كله عايشها باستهتار
~~~~~~~~~~~