بقلم: عادل عبد الرازق
ما أقبلكيش لو توبتي
ما أقبلكيش لو موتي
لو تفردي حروفك نهار
لو تفتحي حيطانك بيبان
ما ترجًعيش فارس قديم
إنكسر قبل الآوان
لمًا انهزم قبل الهزيمة
وقلبه كان ليكي غنيمة
وقبلتي انتصارك واستبحتي
ما أقبلكيش لو توبتي
ما أقبلكيش لو موتي
...
عمر الهوامش ماكانت مداين
وعمر الظلام ما كان جسوري
أنا طيًرت طيوري في عينيكي
من ألف عام ماعادتش طيوري
ولا باستنى ميعاد وميلاد
ولا باحلم إني أكون صيًاد
حتى لو كونتي انتي فريستي
ما أقبلكيش لو توبتي
ما أقبلكيش لو موتي
...
أنا ماقبلش اللي هزمني وسيفي
كان على كتفي بيصارع الريح
ماقبلش اللي رسمته وشطبني
وملاني ف برد الليل تباريح
أرجوكي فارقي مدينتي
أنا رافضك حتى لو اتطًهرتي
ما أقبلكيش لو توبتي
ما أقبلكيش لو موتي
ما اقبلكيش لو صورتك عاشت ف عيوني
من أول عمري لخد قيامتي