بقلم: عادل ابو زيد
صياد على مركبي
والرزق عنواني
مطرح ما تلقى السمك
لازم هاتلقاني
ميّة عرق غنوتي
شرب السمك منها
أكل الحشف مِدْرِتي
وماليش غِنى عنها
باصحى أدان الفجر
أشربلي كاسة صبر
وأدعيه يجمّلها
بصحتي والستر
ايدي على المجداف
وسيري يا فلوكتي
الموخر اللي ورا
داب ف الهوى دوبتي
سارح بزواده
والغزل كالعاده
على خن سجاده
قولو لأمي جاي
أخر النهار ومعاي
رزقي وتعب يومي
أنعس على همومي
وانسى عشان أرتاح
دالعمر لسه براح
والحلم مايموتشي
طول ماحنا ليه نمشي
والرِجل شايلانه
والحلم جوانه
صياد وحلمي كبير
باسمع أغاني الطير
ع الدنيا بتصبح
بتقولي قوم افرح
شوفتك ويجعله خير
ودا من كلام الطير
من بعد ما بتكبر
الكل ليك ينظر
شاكرين تعب عمرك
بيقولو خد راحتك
والباقي واجبنا
تعبك بيتعبنا
هانجيب ونديلك
وكلّه من خيرك
دانت الاساس والأصل
إدّيت ماخدتش وصل
دلوقتي جه دورنا
نتعب عشان غيرنا
يجي يوم ويدينا
بإديه وبإدينا
المركبه هاتسير
والمِدره في ايدي
رزقي على سيدي
والميّه فيها الخير
وياريت أغاني الطير
تصبح حقيقه ف يوم