بلاش نصحى
عشان الصحو بيكلفنا
يجرجرنا نقول في كلام
عن جراحنا
عن الليل اللي ما بينام
عن أوجاعنا بقت أكوام
عن الماضي صبح أوهام
عن الفكرة
عن الساعة تدوم ايام
عن فراشنا صقيع أعوام
عن البلوى
ميت بلوى كل يوم
عن الزهرة الحمرا
عن الغيمة تغطي الشمس
عن سجون المرار في الحلق
عن الخلق اللي ماتوا
عن اموات تستني يجيها الدور
عن الساحة في كل شبر
نواح يغرق مراكبنا
عن عيون تشوف الظلم
في عيون الناس واوجاعها
بلاش نصحى
بلاش نحكي عن جروحنا
مهيش جروح
نزف أرواح بتتالم
بكذبة كبيرة بتتكلم
بشيخ مذبوح على السكة
بطفل يحلم ملوش سكة
في وجع النور في غيابه
في ليل مقهور في حبسه
خلينا في عز النوم
مهموش نوم
موت بظلم نغني له
عاش اللي يبني قبور لقلوبنا